ડ્રાયફ્રૂટ્સ ખરીદતી વખતે માત્ર ચમક ન જોતા! અસલી-નકલીની ઓળખ કરવા આ ૬ વાતોનું ખાસ રાખો ધ્યાન

દિવાળી કે તહેવારોની ખરીદી દરમિયાન ડ્રાયફ્રૂટ્સ ખરીદતી વખતે મોટાભાગના લોકો સૌથી પહેલાં તેના રંગ અને આકર્ષક ચમકથી અંજાઈ જાય છે. એકદમ દૂધ જેવા સફેદ કાજુ, ચમકદાર બદામ કે સોનેરી કિશમિશ જોઈને આપણે માની લઈએ છીએ કે તે સર્વોત્તમ ગુણવત્તાના છે. પરંતુ સત્ય એ છે કે સુંદરતા હંમેશાં શુદ્ધતાની ખાતરી આપતી નથી. બજારમાં વેચાતા વધુ પડતા ચમકદાર ડ્રાયફ્રૂટ્સ ઘણીવાર કેમિકલ પ્રોસેસિંગ, સલ્ફર ટ્રીટમેન્ટ, તેલની પોલિશ કે આર્ટિફિશિયલ કલરનું પરિણામ હોય છે. નકલી, ભેળસેળયુક્ત કે વાસી ડ્રાયફ્રૂટ્સ ખરીદવાથી બચવા માટે આ મહત્વપૂર્ણ ટિપ્સ ધ્યાનમાં રાખો.

કુદરતી રંગ અને બનાવટ તપાસો
સારા અને નેચરલ બદામ હંમેશાં આછા બદામી (લાઇટ બ્રાઉન) અને સ્મૂધ ટેક્સચરવાળા હોય છે. જ્યારે પ્રીમિયમ ક્વોલિટીના કાજુ હળવા ક્રીમી વ્હાઇટ હોય છે, નહીં કે પ્લાસ્ટિક જેવા ચમકદાર સફેદ. કાજુ કે બદામ પર કાળા ધબ્બા, ફૂગ કે વધુ પડતા તૂટેલા ટુકડા નબળી ગુણવત્તા સૂચવે છે. એકસરખા કદ અને આકારના ડ્રાયફ્રૂટ્સ સારી રીતે ગ્રેડિંગ થયેલા હોવાની નિશાની છે.

સુગંધ (Smell) પરથી તાજગી ઓળખો
ખરીદતાં પહેલાં ડ્રાયફ્રૂટ્સને સહેજ સૂંઘીને જુઓ. કુદરતી અને તાજા મેવામાંથી મીઠી અને હળવી નટી (Nutty) સુગંધ આવે છે. જો તેમાંથી સીલન (ભેજ), વાસી તેલ કે ખાટી દુર્ગંધ આવતી હોય, તો સમજી લેવું કે તેનો સંગ્રહ ખરાબ સ્થિતિમાં થયો છે અથવા તે જૂનો અને એક્સપાયર થયેલો માલ છે.

સ્વાદ પારખવાનું પણ છે સૌથી જરુરી
જો શક્ય હોય તો ખરીદી કરતાં પહેલાં એક-બે નંગ ચાખીને ગુણવત્તા નક્કી કરો. તાજા સૂકા મેવાનો સ્વાદ ક્રન્ચી, મીઠો અને કુદરતી તેલથી ભરપૂર હોય છે. જો સ્વાદ કડવો, મોળો કે વાસી લાગે તો તે ન ખરીદવા. ખજૂર અને કિશમિશ ચાવવામાં સહેજ સોફ્ટ અને કુદરતી ગળ્યા હોવા જોઈએ. જો તે પથ્થર જેવા કડક કે સુકાયેલા લાગે તો તે વાસી હોઈ શકે છે.

પોલિશ અને કેમિકલ કોટિંગનો ટેસ્ટ કરો
ડ્રાયફ્રૂટ્સને વધુ વજનદાર અને ચમકદાર બનાવવા માટે ઘણીવાર તેના પર મીણ, ખાદ્ય તેલ કે ખાંડના પાણીની કોટિંગ કરવામાં આવે છે. ડ્રાયફ્રૂટ્સને સફેદ સુતરાઉ કપડા કે ટિશ્યુ પેપર પર હળવેથી ઘસો. જો કાગળ કે કપડા પર તેલ, પીળો કે અન્ય કોઈ રંગ ચોંટી જાય, તો તેના પર કેમિકલ પોલિશ કરવામાં આવી છે. હંમેશાં અનપોલિશ્ડ ડ્રાયફ્રૂટ્સને પ્રાથમિકતા આપો.

પેકિંગ લેબલ અને FSSAI માર્ક ચકાસો
પેક્ડ ડ્રાયફ્રૂટ્સ ખરીદતી વખતે પેકેટ પર એફએસએસએઆઈ લાયસન્સ નંબર, પેકિંગ ડેટ અને એક્સપાયરી અચૂક તપાસો. વેક્યૂમ-સીલ કે નાઇટ્રોજન ફ્લશ કરેલા એરટાઈટ પેકેટ્સ પસંદ કરો, જેથી ભેજ લાગવાનો કે ફૂગ થવાનો ખતરો ન રહે.

ખુલ્લા મેવામાં ભેજ અને જીવાતથી સાવધાન
લૂઝ (ખુલ્લા) ડ્રાયફ્રૂટ્સ ખરીદતી વખતે ખાસ ધ્યાન રાખો કે તેમાં જીવાત, જાળા કે સફેદ પાવડર જેવો કચરો ન હોય. ઘરે લાવ્યા પછી પણ તેને પ્લાસ્ટિકની કોથળીમાં રાખવાને બદલે કાચની એરટાઈટ બરણીમાં અને સૂકી જગ્યાએ સ્ટોર કરો.