Abroad અને Foreign વચ્ચે શું છે તફાવત? જાણો અંગ્રેજી બોલતી વખતે થતી અમુક ભૂલોથી કેવી રીતે બચશો?

વિદેશ જતી વખતે કે અંગ્રેજી બોલતી વખતે થતી આ સામાન્ય વ્યાકરણની ભૂલો સુધારો અને જાણો ક્યાં વાપરવું Abroad અને ક્યાં Foreign

અંગ્રેજી ભાષા શીખતી વખતે કે રોજિંદા વ્યવહારમાં બોલતી વખતે મોટાભાગના લોકો એવા શબ્દોમાં મૂંઝવણ અનુભવતા હોય છે જેનો અર્થ લગભગ એક સરખો દેખાય છે, પરંતુ વ્યાકરણના નિયમો સાવ જુદા હોય છે. આવી જ મૂંઝવણ Abroad અને Foreign શબ્દોને લઈને થાય છે. આ બંને શબ્દોનો સંબંધ આપણા દેશની બહારની દુનિયા કે અન્ય દેશો સાથે જ છે, છતાં બંનેનો ઉપયોગ ક્યારે અને કેવી રીતે કરવો તે અંગે ઘણા લોકો અજાણતાં મોટી ભૂલો કરતા હોય છે.

Abroad શબ્દનો સાચો અર્થ અને ગ્રામરનો નિયમ
અર્થ: ગુજરાતીમાં ‘Abroad’ નો અર્થ ‘વિદેશમાં’ કે ‘પરદેશની તરફ’ એવો થાય છે. જ્યારે કોઈ વ્યક્તિ પોતાના વતન કે દેશને છોડીને અન્ય દેશમાં જાય છે, ત્યાં રહે છે કે અભ્યાસ કરે છે, ત્યારે આ શબ્દ વપરાય છે.
ક્રિયા-વિશેષણ (Adverb): વ્યાકરણની દ્રષ્ટિએ Abroad એક ક્રિયા-વિશેષણ (Adverb) છે.
સૌથી મોટી ભૂલ (No Preposition): ઘણા લોકો go to abroad કે living in abroad બોલવાની ભૂલ કરે છે. Abroad ની આગળ ક્યારેય to, in કે at જેવા પ્રેપોઝિશન (Prepositions) લાગતા નથી.
સીધો વપરાશ: તેને હંમેશા ક્રિયાપદની તરત પછી સીધું વાપરવામાં આવે છે, જેમ કે go abroad, live abroad અથવા study abroad.
આ શબ્દ પછી કોઈ વધારાની સંજ્ઞા (Noun) પણ ઉમેરવામાં આવતી નથી.

Foreign શબ્દનો સાચો અર્થ અને વપરાશ
અર્થ: ‘Foreign’ નો અર્થ ‘વિદેશી’ કે ‘પરદેશી’ થાય છે. તે કોઈ એવી વસ્તુ, વ્યક્તિ, ભાષા, સંસ્કૃતિ કે નીતિ દર્શાવે છે જે આપણા પોતાના દેશની ન હોય પણ બીજા કોઈ દેશની હોય.
વિશેષણ (Adjective): વ્યાકરણ મુજબ Foreign એક વિશેષણ (Adjective) છે, જે કોઈ વસ્તુ કે સ્થાનની વિશેષતા દર્શાવે છે.
નામની આગળ વપરાશ: Abroad થી વિપરીત, Foreign શબ્દ હંમેશાં કોઈ ચોક્કસ સંજ્ઞા (Noun) ની બરાબર આગળ મૂકવામાં આવે છે.

ઉદાહરણ: જેમ કે foreign country (વિદેશી દેશ), foreign language (વિદેશી ભાષા), foreign currency (વિદેશી ચલણ) કે foreign policy (વિદેશ નીતિ).
Foreignની સાથે જરૂરિયાત મુજબ વાક્યમાં પ્રેપોઝિશનનો ઉપયોગ કરી શકાય છે.

સરળ ઉદાહરણોથી સમજો બંને વચ્ચેનો તફાવત
જો તમે કહો છો કે હું અભ્યાસ માટે વિદેશ જઈ રહ્યો છું”, તો અંગ્રેજીમાં એવું થશે કે I am going abroad for studies. અહીં ‘going to abroad’ બોલવું વ્યાકરણની દ્રષ્ટિએ સાવ ખોટું છે. પરંતુ જો તમે કોઈ વિદેશી દેશનો સંદર્ભ આપો છો, તો લખાશે: “He is traveling to a foreign country.” ટૂંકમાં કહીએ તો, Abroadએ ‘ક્યાં જવું કે ક્યાં રહેવું’ (સ્થાનની સ્થિતિ) દર્શાવે છે, જ્યારે Foreign એ ‘કોઈ વસ્તુ કે વ્યક્તિ ક્યાંની છે’ (તેની વિદેશી વિશેષતા) દર્શાવે છે.