ગુજરાત બન્યું દેશનું ફ્લાઇંગ ટ્રેનિંગ હબ: પાઇલટ તાલીમ ક્ષેત્રે ક્રાંતિકારી પહેલ

પીપીપી મોડલ અને આધુનિક ઇન્ફ્રાસ્ટ્રક્ચર દ્વારા ગુજરાતમાં ફ્લાઇંગ ટ્રેનિંગ ઓર્ગેનાઇઝેશનોનું વિસ્તરણ, જે યુવાનો માટે રોજગારીની સોનેરી તકોનું સર્જન કરશે

ગુજરાતમાં સિવિલ એવિએશન વિભાગ દ્વારા પબ્લિક-પ્રાઇવેટ પાર્ટનરશિપ (PPP) મોડલ થકી ફ્લાઇંગ ટ્રેનિંગ ઓર્ગેનાઇઝેશનનો વિકાસ કરી રહ્યું છે. આ માળખા હેઠળ રાજ્ય માલિકીના એરપોર્ટ અને એરસ્ટ્રિપો પર આશરે 1,500 ચોરસ મીટર જમીન પારદર્શક બિડિંગ પ્રક્રિયા દ્વારા પાત્ર ઓપરેટરોને ફાળવવામાં આવી છે. આ પહેલનો હેતુ કુશળ એવિએશન માનવબળ તૈયાર કરવાનો છે અને ખાનગી રોકાણ આકર્ષવાનો છે.

ભારતનું સિવિલ એવિએશન ક્ષેત્ર વધતા પેસેન્જર ટ્રાફિક, ઉડાન યોજના હેઠળ પ્રાદેશિક કનેક્ટિવિટીના વિસ્તરણ અને સ્થાનિક એરલાઇનો દ્વારા મોટા પાયે નવા વિમાનોની ખરીદીના કારણે ઝડપથી વિકસી રહ્યું છે. ભારતીય એરલાઇનોએ સંયુક્ત રીતે આશરે 1,700 નવા વિમાનોના ઓર્ડર આપ્યા છે, જેના પરિણામે આગામી વર્ષોમાં અંદાજે 25,000થી 30,000 કોમર્શિયલ પાઇલટોની માંગ ઊભી થવાની શક્યતા છે. આ ઉભરી રહેલી તકને ધ્યાનમાં રાખીને ગુજરાત સરકારે સિવિલ એવિએશન વિભાગ અને ગુજરાત સ્ટેટ એવિએશન ઇન્ફ્રાસ્ટ્રક્ચર કંપની લિમિટેડ (GUJSAIL) મારફતે વિશ્વસ્તરીય પાઇલટ તાલીમ ઇન્ફ્રાસ્ટ્રક્ચર વિકસાવવા પર ધ્યાન કેન્દ્રિત કર્યું છે.

ગુજરાત બન્યું ભારતનું ફ્લાઇંગ ટ્રેનિંગ હબ
હાલમાં રાજ્યમાં પાંચ ફ્લાઇંગ ટ્રેનિંગ ઓર્ગેનાઇઝેશન (FTO)કાર્યરત છે. તેમાંથી ચાર રાજ્ય માલિકીની મહેસાણા અને અમરેલી એરસ્ટ્રિપો પર કાર્યરત છે, જ્યારે એક FTO ભારતીય એરપોર્ટ ઓથોરિટી (એરપોર્ટ ઓથોરિટી ઓફ ઇન્ડિયા)દ્વારા ફાળવવામાં આવેલી જમીન પર ભાવનગર એરપોર્ટ ખાતે કાર્યરત છે. કાર્યરત FTOમાં મહેસાણા ખાતે સ્કાયનેક્સ એરો પ્રા. લિ અને બ્લૂ રે એવિએશન પ્રા. લિ.; અમરેલી ખાતે વિઝન ફ્લાઇંગ ટ્રેઇનીંગ ઇન્સ્ટિટ્યૂટ અને ગુજરાત ફ્લાઇંગ ક્લબ તથા ભાવનગર ખાતે દુનેસ એવિએશન પ્રા.લિનો સમાવેશ થાય છે.

પાઇલટ તાલીમ ઇકોસિસ્ટમમાંનું એકમ બનાવશે
રાજ્યની એવિએશન ક્ષેત્રની મહત્વાકાંક્ષાઓને વધુ વેગ મળવાનો છે, કારણ કે, વધુ પાંચ ફ્લાઇંગ ટ્રેનિંગ ઓર્ગેનાઇઝેશન ટૂંક સમયમાં કાર્યરત થશે. આ તમામ સંસ્થાઓ કાર્યરત થયા બાદ ગુજરાતમાં કુલ 10 ફ્લાઇંગ ટ્રેનિંગ ઓર્ગેનાઇઝેશનનું નેટવર્ક હશે, જે ગુજરાતને ભારતના સૌથી મોટા રાજ્યસ્તરીય પાઇલટ તાલીમ ઇકોસિસ્ટમમાંનું એકમ બનાવશે.”

ગુજરાત ફ્લાઇંગ ક્લબનું વિશેષ સ્થાન
ગુજરાતની ફ્લાઇંગ ટ્રેનિંગ ઓર્ગેનાઇઝેશનોએ સંયુક્ત રીતે અત્યાર સુધીમાં 5,200થી વધુ એવિએશન વિદ્યાર્થીઓને તાલીમ આપી છે, 3,200થી વધુ કમર્શિયલ પાઇલટ લાઇસન્સ (CPL) ધારકો તૈયાર કર્યા છે અને 200થી વધુ ભાવિ પાઇલટને તાલીમ આપી રહી છે. આ સંસ્થાઓમાં ગુજરાત ફ્લાઇંગ ક્લબનું વિશેષ સ્થાન છે. વર્ષ 1958માં વડોદરા એરપોર્ટ ખાતે સ્થાપિત આ સંસ્થા આજે પણ ભારતની સૌથી લાંબા સમયથી કાર્યરત ડિરેક્ટોરેટ જનરલ ઑફ સિવિલ એવિએશન (DGCA) માન્ય ફ્લાઇંગ ટ્રેનિંગ સંસ્થાઓમાંની એક છે.

અનુકૂળ હવામાન ગુજરાતને વધારાનો લાભ આપે છે
એવિએશન તાલીમ ક્ષેત્રે ગુજરાતને અનેક પરિબળો સ્પર્ધાત્મક લાભ આપે છે. રાજ્યમાં આખુ વર્ષ ફ્લાઇંગ માટે અનુકૂળ હવામાન પુરુ પાડે છે, એરપોર્ટ અને એરસ્ટ્રિપ્સનું વ્યાપક નેટવર્ક છે. ઉપરાંત, રાજ્ય પાસે માલિકીનું એવિએશન ઇન્ફ્રાસ્ટ્રક્ચર ઉપલબ્ધ છે. વળી, મજબૂત ઔદ્યોગિક અને લોજિસ્ટિક્સ સપોર્ટ, ઉત્તમ માર્ગ જોડાણ તથા રોકાણકારોને અનુકૂળ નીતિ ઉપલબ્ધ છે.

મજબૂત FTO ઇકોસિસ્ટમથી આર્થિક લાભમાં વધારો
પાઇલટ તૈયાર કરવા ઉપરાંત, વિસ્તરી રહેલું FTO ઇકોસિસ્ટમ નોંધપાત્ર આર્થિક લાભોનું સર્જન કરશે. દરેક ફ્લાઇંગ ટ્રેનિંગ ઓર્ગેનાઇઝેશન માટે વિમાનો, સિમ્યુલેટર્સ, મેન્ટેનન્સ હેંગર્સ, ફ્યુઅલ ઇન્ફ્રાસ્ટ્રક્ચર, ક્લાસરૂમ્સ, હોસ્ટેલ અને વહીવટી સુવિધાઓમાં મોટા પાયે રોકાણ જરૂરી બને છે.
આવા રોકાણોથી ગુજરાતની એવિએશન ઇકોનોમી વધુ મજબૂત થવાની સાથે કોમર્શિયલ ફ્લાઇંગ ઇન્સ્ટ્રક્ટર્સ, એરક્રાફ્ટ મેન્ટેનન્સ એન્જિનિયર્સ, ફ્લાઇટ ડિસ્પેચર્સ, ઓપરેશન્સ ઓફિસર્સ, સેફ્ટી પ્રોફેશનલ્સ, વહીવટી કર્મચારીઓ અને ગ્રાઉન્ડ સપોર્ટ સ્ટાફ માટે રોજગારીની તકો ઊભી થશે.

FTOથી સ્થાનિક અર્થતંત્રને પણ મળશે વેગ
FTOનું વધતું નેટવર્ક એરક્રાફ્ટ મેન્ટેનન્સ, રિપેર એન્ડ ઓવરહોલ (MRO), એવિએશન ફ્યુઅલ સેવાઓ, ફ્લાઇટ સિમ્યુલેટરો, એરોસ્પેસ મેન્યુફેક્ચરિંગ, ડ્રોન પાઇલટ ટ્રેનિંગ, એવિએશન સોફ્ટવેર અને કન્સલ્ટન્સી સેવાઓ જેવા સંલગ્ન ક્ષેત્રોને પણ વેગ આપશે. સાથે જ, સરકારી માલિકીના એરપોર્ટ અને એરસ્ટ્રિપોનો વધુ ઉપયોગ થવાથી ઇન્ફ્રાસ્ટ્રક્ચરની કાર્યક્ષમતા વધશે અને લીઝ પ્રીમિયમ, જમીન ભાડું, એરક્રાફ્ટ પાર્કિંગ, હેંગર સુવિધાઓ અને ફ્યુઅલ વેચાણ મારફતે લાંબા ગાળે આવકનું સર્જન થશે.