નવરાત્રીમાં ભેળસેળિયાઓ ખેર નથી! રાજ્યમાં મોબાઈલ ફૂડ ટેસ્ટિંગ વાન દોડશે, કડક કાર્યવાહીની ચીમકી
ગાંધીનગરમાં આરોગ્ય મંત્રી પ્રફુલ પાનશેરીયાની સમીક્ષા બેઠક: શુદ્ધ ખોરાક સુનિશ્ચિત કરવા રાજ્યવ્યાપી ચેકિંગ અને કાનૂની પગલાં લેવાશે
ગાંધીનગરઃ નવરાત્રી પર્વ દરમિયાન અને ત્યારબાદ પણ રાજ્યના નાગરિકોના આરોગ્યની જાળવણી માટે શુદ્ધ, સાત્વિક અને ભેળસેળરહિત ખાદ્યપદાર્થો ઉપલબ્ધ થાય તે સુનિશ્ચિત કરવા આરોગ્ય મંત્રીએ ગાંધીનગર ખાતે ખોરાક અને ઔષધ નિયમન તંત્રના કમિશનર અને ઉચ્ચ અધિકારીઓ સાથે એક મહત્વપૂર્ણ સમીક્ષા બેઠક યોજી હતી.
આ બેઠકમાં આરોગ્ય મંત્રી પ્રફુલ પાનશેરીયાએ ભારપૂર્વક જણાવ્યું હતું કે, નવરાત્રિ દરમિયાન મીઠાઈ, ફરસાણ, દૂધ અને ઘી જેવા ખાદ્ય પદાર્થોમાં થતી ભેળસેળ રોકવા માટે રાજ્યભરમાં મોબાઈલ ફૂડ ટેસ્ટિંગ વાન કાર્યરત રહેશે. આ વાહનો સ્થળ પર જ ખાદ્ય સામગ્રીની ગુણવત્તા ચકાસશે. આ ઉપરાંત ભેળસેળયુક્ત કે હલકી ગુણવત્તાનો ખોરાક વેચનારાઓ સામે કડકમાં કડક કાનૂની પગલાં રાજ્ય સરકાર દ્વારા ભરવામાં આવશે તેવી તેમણે ચીમકી પણ આપી હતી.
મંત્રીએ જનતાને જાગૃત કરતા અપીલ કરી હતી કે, શુદ્ધ અને પૌષ્ટિક આહાર ગ્રહણ કરવો એ પ્રત્યેક નાગરિકનો હક છે. ગ્રાહકો હોટેલ કે રેસ્ટોરન્ટના રસોડાની સ્વચ્છતાની ચકાસણી જાતે કરી શકે છે. જો ક્યાંય પણ અસ્વચ્છતા માલૂમ પડે, તો નાગરિકો તુરંત તેની સત્તાવાર ફરિયાદ ખોરાક અને ઔષધ નિયમન તંત્રની કચેરી ગાંધીનગર ખાતે નોંધાવી શકે છે.
આ ઉપરાંત, મંત્રીના માર્ગદર્શન હેઠળ ગુજરાત રાજ્ય ખોરાક અને ઔષધ નિયંત્રણ તંત્ર દ્વારા તા. ૧૪ થી ૨૮ સપ્ટેમ્બર ૨૦૨૬ દરમિયાન રાજ્યવ્યાપી હોસ્ટેલ-કેન્ટીન સ્પેશિયલ ડ્રાઈવ હાથ ધરવામાં આવી હતી, જેમાં કુલ ૧૪૦૭ હોસ્ટેલ-કેન્ટીનની તપાસ કરવામાં આવી હતી, જેમાં ૨૫૯ સરકારી, ૩૦૩ અર્ધસરકારી તથા ૮૪૫ ખાનગી એકમોનો સમાવેશ થાય છે. તપાસ દરમિયાન કુલ ૩૨૮ હોસ્ટેલ-કેન્ટીનને ઇમ્પ્રુવમેન્ટ નોટિસ આપવામાં આવી હતી, તથા ૪૫૯ હોસ્ટેલ-કેન્ટીનના ખાદ્ય નમૂનાઓ લઈને લેબોરેટરીમાં ચકાસણી માટે મોકલવામાં આવ્યા હતાં. આ તપાસ દરમિયાન ૧૬ એકમો સ્વૈચ્છિક રીતે બંધ કરવામાં આવ્યા હતા તેમજ ૫ એકમના લાઇસન્સ સસ્પેન્ડ કરવામાં આવ્યા હતા
આ અભિયાન માત્ર તહેવારો પૂરતું મર્યાદિત ન રહેતા કાયમી ધોરણે ચાલુ રહેવું જોઈએ, જેથી નાગરિકોના સ્વાસ્થ્ય સાથે કોઈ ચેડા ન થાય અને શુદ્ધ ખોરાક મળી રહે. ખાસ કરીને સુરત, અમદાવાદ અને વડોદરા જેવી મહાનગરપાલિકાઓની ટીમો દ્વારા દિવસ-રાત કરવામાં આવતી આ કામગીરી અત્યંત પ્રશંસનીય છે તેમ મંત્રીએ જણાવ્યું હતું.